Meðan vit tosa um kringvarpsgjald – Part two

Nú havi eg gjørt, sum Árni Zachariassen bað: eg havi hugt eftir sendingini um Victoriu Wild. Tvs. eg misti byrjanina, tí ommudótturin mátti sleppa at síggja ein part av No Ordinary Family lidnan.

Eg kom inn í sendingina, tá Victoria situr við sushi og tosar um etingarólag.

Eg eri glað fyri, at eg havi hugt at sendingini, tí annars hevði eg ikki verið frægari enn Jenis av Rana, Gerhard Lognberg og sovorðnir, sum øsa seg um ymiskt t.d. Ginusøgurnar á sinni, uttan at hava sæð tær.

Og eg má viðganga, at eg framvegis haldi, at tað ikki var pengarnar (les kringvarpsgjaldið)  vert at senda hetta.

Men ok, eg fekk so argumentini hjá Victoriu við um, hví tað hevur so stóran týdning at strippa. Men eg má siga, at mínir fordómar ikki fingu nakað skot fyri bógvin. Hetta er nakað tað sama, sum flestir stripparar hava  á lofti, tá tær skulu rættvísgera fakið innan tænastuvinnuna.

Eitt sum sló meg, var samanberingin, hon gjørdi millum seg sum strippara og flakakonur. Og har má eg loyva mær at vera ósamd. Tað er als ikki tað sama! Flakakonan selur ikki sín kropp, men sína arbeiðskraft, munurin er himmalvíður. Rokni ikki við, at flakakonur halda tað vera sexut at arbeiða í flaki og hondina á hjartað, tað er tað á ongan hátt.

Tað, sum skelkaði meg mest var toppleysa serveringin! Í orðabókini hjá Sprotanum fann eg orðið lutliggerð, tað má vera rætta orð at lýsa hetta við! Ungdómar sluppu at handska bróstini á henni, meðan hon gekk runt á vertshúsinum við bróstunum hangandi uttanfyri klæðini. Um hetta ikki er ringasta niðurgering av sær sjálvari, so veit eg ikki, hvat niðurgering er!

Tá eg sá hana strippa fyri komandi brúðgóminum, hugsaði eg við mær: neyðars brúður. Eg haldi, eg hevði biðið mín komandi brúðgóm riðið og reist, um eg visti, hvat hann hevði gjørt dagin fyri brúdleypið. Hugsaði, at kanska eg var nakað snerput og spurdi tí onkrar av mínum medsystrum, og ongin teirra var ósamd. Men tær kanska ræðast meg, hvør veit? Ella eru vit bara allar snerputar.

Medsystrar, ja. Eg havi hoyrt nógv tos um hesa sendingina. Og tað er sera áhugavert at hoyra ymsu meiningarnar um hana. Ella tað vil siga, ymsar eru tær nú ikki kortini. Ein bólkur heldur tað vera út av lagi vánaligt av SVF at senda hetta. Tað er stór synd í gentuni, siga tey. Hon hevur brúk fyri sálarhjálp heldur enn at verða útstillað. Hin parturin slevar, sleikir sær um varrarnar, flennur niður fyri seg og tosar um boppur og sex. Git hvat kyn er flest av í hvørjum bólki?

Sjálv haldi eg, at Victoria Wild ger gentum og kvinnum eina ringa tænastu: Hon slær fast við sjeytummaseymi, at tað er í fínasta ordan at síggja niður á gentur og tískil gera seg inn á tær. Hon heldur lív í júst tí sama, sum hon sjálv hevur verið útsett fyri sum smágenta: skemd. Hetta ljóðar kanska óluksáliga hart at siga, men jú oftari og meiri tú sært kvinnur verða gjørdar til lutir og lýstar sum sexobjekt, jú legalari er tað, at gera seg inn á tær! Tær biðja jú um tað ikki sannheit, neyðtøkuoffrini. Hygg bara at lýsingini hjá mætu fyritøkuni Dolce & Gabbana.

Legaliseringin ella tilvenjingin er at finna í sexvinnuni á sama hátt sum harðskapsvinnuna, har vit óttast avleiðingarnar av at børn og ung brúka so nógva tíð uppá hesi vamlisligu internetsíðurnar og telduspølini, har harðskapur og ráskapur er alfa og omega.

Eitt, sum eg helt vera áhugavert og sigandi í sendingini, var tað provokativa í at brúka tjóðbúnan og Merkið í arbeiðinum sum strippari. Hetta er eisini nakað, ið hevur øst nógv fólk upp. Sjálv kann eg ikki øsa meg upp um tílíkt. Tjóðbúnin er eftir mínum tykki ikki heilagur, so fólk kunnu brúka hann, sum tey vilja, og tað gera tey væl eisini. Og Merkið hevði tað fínt, har tað var. Júst hetta var eftir mínum tykki bara eitt prógv um, at Victoria Wild dugir at selja seg! Tað kann ikki takast frá henni.

Meðan vit tosa um kringvarpsgjald

Tá eg var ung og eldhugað, plagdi eg at stríðast nógv ímóti følskum ímyndum av konufólki. Konufólk, sum lógu oman á bilum og traktorum í næstan ongum klæðum, tær høvdu als onki við bilar og traktorar at gera, tí tað mundu vera fáar teirra, sum áttu traktor ella koyrdu bil líka nógv sum mannfólk. Eg var ung í sjeytiárunum, má eg skunda mær at viðganga, og tá var alt so nógv øðrvísi enn í dag.

Hetta er nokkso vanligt at siga: at alt var øðrvísi fyrr, men munurin er tó tann, at eg sigi ikki, sum tey plagdu at siga fyrr: at alt var nógv betur fyrr, men tvørturímóti, so var alt nógv verri fyrr.

Kvinnur vóru læstar fastar í leiklutir, sum menn defineraðu. Størsta íkast teirra var at føða børn, ala tey upp og geva øllum at eta og lata tey í. Og tað vart tú ikki respekterað fyri: respekt var nakað, tú ognaði tær av løntum arbeiði og vøddum.

Vit, sum tá talaðu harðliga at hesi altoyðileggjandi myndini av kvinnum sum føðimaskinu og elskarinnu, vóru sagdar at gera tað tí 1) vit vóru lesbiskar 2) vit hataðu menn 3) vit vóru so misháttar, at vit fingu ikki menn

Í dag kann eg leggja eitt aftrat: øvundsjúku, tí at eg nú eri so tilkomin, at eg ikki kann samanbera meg við Victoria Wild til dømis. Eg fari aldri at gerast s. 9 genta í Ekstrablaðnum, og tað hevur sjálvandi altíð verið mín størsti dreymur.

Victoria Wild, ja. Í gjárkvøldið sá eg ein bita av einari sending um hesa gentuna. Eg skundaði mær at fara av SVF –rásini, tí eg gerist stutt sagt sjúk inn í sálina at síggja tílíkt idiotiskt slutur.

Tað tykist meira og meira legalt, at miðlar geva rúm fyri hesari niðurgeringini. Í staðin fyri at brúka teir fáu pengarnar, kringvarpið sigur seg eiga, til barna- og ungdómssendingar, mentanarsendingar, undirhaldsendingar ella t.d. eina kanning av føroyska loftrúminum og CIA, so velur man nakað so innantómt sum at fylgja einari strip tease dansarinnu í arbeiði.  Álvaratos – hvar er logikkurin?

Men tendensurin er tann sami her sum aðrastaðni, nú skulu kvinnur kroystast niður aftur í hesar leiklutirnar sum sex-objektir.

Nýliga hevur verið ein sending í danska sjónvarpinum, har prostitueraðar greiða frá, at nei, tær eru yvirhøvur ikki noyddar at prostituera seg, tær gera tað við beráddum huga, tí teimum dámar sex og pengar.  Og so skítur man høgt og flott uppá, at tað ber altso til at fáa bæði sex og pengar uttan at prostituera seg! Og man skítur eisini høgt og flott uppá tær óteljandi gentur, sum gera tað vegna rúsevnismisnýtlsu, tí tær sjálvar hava verið seksuelt misnýttar sum børn og so allar tær neyðars gentur, sum koma eystanífrá av neyð, ella tí tær eru noyddar til hetta av pengagrískum fólki.

Eg havi mangan hugsað um, hvussu tað ber til, at kvinnur so glaðbeintar vilja vísa sín nakna kropp fram. Umvent sært tú sera sjáldan pissilingin á einum manni á myndum ella filmi, hann hevur altíð eitt handklæði ella okkurt fyri, men kvinnur tær kunnu liggja sum várharra hevur skapt tær á hvørjari blaðsíðu og filmi, sum um onki var.

Herfyri hoyrdi eg kjak um, hvørt tað var uppá tíðina, at menn eisini fóru at vísa seg naknar, men tað vóru menninir, sum tóku lut í kjakinum, als ikki samdir í fór at gera teir frælsari. Eg eri nokk so vís í, at menn ansa væl eftir at hava sín integritet órørdan við ikki at blotta seg. Tað er jú gamalt, at tú mást ikki blotta teg, leggja alt opið fyri fólki, tað missir tú valdið av. Og soleiðis er tað í veruleikanum, tú hevur onki eftir at forhandla við, tá tú hevur lagt teg nektaða framman fyri øllum.

Victoria Wild má fyri mína skyld gjarna strippa í føroyskum klæðum, bispakápu ella við útróðrarskríni, eg skilji bara ikki, at okkara almenni miðil, Kringvarpið, vil brúka pengar uppá sovorðið høvuðleyst tvætl, sum samstundis er ein niðurgering av kvinnukyninum.